INFORMAZIOAREN KUDEAKETA

Aurreko sarreretan konpetentzia digitalari buruz aritu gara eta behin eta berriz errepikatu dugu oso garrantzitsua dela informazioa kudeatzea. Izan ere, konpetentzia digitala ez da bakarrik tresnak erabiltzea, askoz ere kontzeptu zabalagoa eta konplexuagoa da. Informazioaren kontsumitzaile gisa, argi izan behar dugu zer bilatu nahi dugun; zer behar dugun, hau da, zein den gure bilaketaren helburua; nola eta non bilatu behar dugun; aurkitutako informazioa nork sortu duen eta azkenik, informazioa aztertu beharko dugu, informazio hori interpretatu ahal izateko.

Laburbilduz, TTBB erabiltzen ditugunean oso garrantzitsua da informazioa kudeatzen jakitea. Oraingo honetan Matematikari buruzko material multimedia bilatu eta kudeatu behar izan dugu, prozesu horren ostean hiru web orrialde aukeratzeko. Horretarako urrats batzuk jarraitu ditugu:

- Informazioa bildu

- Informazio hori baloratu:  nik behar dudan informazioa da?

- Informazioa aukeratu: gure kasuan delicious erabiliko dugu aukeratutako informazioaren erreferentzia gordetzeko.

- Aukeratutako informazioa aztertu nahi dugun helburuaren arabera.

Arestian aipatu dudan moduan, gai bat aukeratu dugu, Lehen Hezkuntzan lantzeko material Multimedia bilatzeko. Nik matematikako arloa aukeratu dut eta 8 sarrera egin ditut delicious-en horietatik hiru web orrialde aukeratzeko eta aztertzeko. Hauek dira kontuan hartzeko irizpideak web orrialdeak aztertzerako orduan:

- Diseinua: Informazioa eta loturak ondo antolatuta daude? (adierazgarriak? erabiltzeko errazak?); Ikusteko atsegina da?

- Edukia: Eskaintzen dituen informazioa eta loturak interesanteak dira? Edukiak honela daude sailkatuta: (bereziki bilatzaileen kasuan)

- Elementu teknikoak: Berehala ikusten dugu interesatzen zaiguna? Arina da? Loturak arin kargatzen dira? Grafikoak eta marrazkiak arin agertzen dira?

- Sinesgarria: Orrialdearen egilea identifikatzen da? Pertsona, erakunde, instituzio,...? Edukiak eta loturak gaurkotuak dira.

Deliciousen matematikari buruzko zortzi helbideren erreferentzia dauzkat eta horietatik  hiru aztertuko ditut. Begi bistaz interesgarrienak eta motibagarrienak aukeratu ditut. Azterketa hori egiteko aipatutako irizpideak erabiliko ditut.

1. MATEMATIKA INTERAKTIBOAK GEOGEBRA-REKIN

Diseinuari dagokionez, kolore biziak erabiltzen dira eta matematikari buruzko ariketak oso argi agertzen dira sailkatuta, beraz, erraza da gaiak topatzea. 22 gai desberdin daude nahiz eta eduki batzuk ez diren Lehen Hezkuntzan lantzen. Hala ere, LHko ikasle batek ez luke arazorik izango landu nahi duen gaia aukeratzeko nahiz eta lehenengo zikloan heldu batekin lantzea komenigarria den, ariketetan lantzen dena hobeto ulertzeko. Web orri honetan maila desberdineko ariketa eta azalpenak daude eta agertzen den lotura bakarra DBHko 3.mailako lan fitxak dira. Hasieran esan dudan moduan, kolore biziak agertzen dira eta gai bakoitzaren ondoan gaiari dagokion marrazkia dago. Arlo teknikoari dagokionez, oso ondo funtzionatzen du programak baina aipatu behar da Java aplikazioa instalatuta izan behar dugula ordenagailuan Geogebra erabili ahal izateko. Sinisgarritasunari dagokionez, web orrialdearen hasieran ipintzen du nortzuk diren autoreak. Geogebra euskaraz zein gaztelaniaz erabili dezakegu

2. MATEMATIKA LEHEN MAILAKO HEZKUNTZA - 2. ZIKLOA-

Web orrialde honetan, LHko 2.zikloko ariketak agertzen dira “zenbakiak eta eragiketak” eta “neurria eta geometria” arloak lantzeko. Diseinuari dagokionez, lehenengo orrialdea, hau da, ariketa motak agertzen diren orrialdea nahiko sinplea da. Ez du marrazkirik eta letra txikia da, bera, ez da batere erakargarria haurrentzat. Hala ere, behin ariketa mota eta zailtasun maila aukeratuta, ariketak oso erakargarriak dira:marrazkiak dituzte, koloretsuak dira, letra handia dute, entzunezko azalpenak ematen ditu… Agertzen den arlo bakoitzak hiru zailtasun maila ditu eta zailtasun maila bakoitzean aukera desberdinak daude: ariketaren adibide eta azalpena, ariketa erraza, ariketa zailagoa, birpazaketa bat eta azkenik, irakasleentzako orientabideak. Elementu teknikoei dagokienez, oso erraz erabiltzen da eta behin arloa eta ariketak aukeratuta (3.ziklokoak gai izango lirateke baina gazteagoak ez), ikonoak marrazki sinpleen bidez adierazita daudelako eta letrak eta zenbakiak handiak direlako. Autorea Edebe editoriala da. Material multimedia hau euskaraz eta gaztelaniaz erabili dezakegu.

3. MATH MAGICIAN GAMES

Material multimedia hau ingelesez dago baina oso erraz ulertzen da. Gainera, marrazkiak agertzen direnez, oso erraza da ariketak bereiztea. Diseinuari dagokionez, argi dago ikasle gazteentzat  eginda dagoela letra handia delako eta marrazkiak daudelako. Lau ariketa mota daude: batuketak, kenketak, zatiketak eta biderketak eta bakoitzaren barruan bi maila daude. Alegia, 1.ziklotik hasita 3.zikloan ere erabili daiteke bai birpazatzeko eta matematika ikasteko baita ingelesa ikasteko ere. Elementu teknikoei dagokienez, ez dago inolako arazorik eta esan beharra dago ez daudela loturarik. Azkenik, autorea edo autoreak hezkuntza arloko langileak direla suposatu dezakegu. Izan ere, hau da orrialdearen amaieran ipintzen duena: Copyright 2002, la ciudad de Oswego Distrito Escolar Oswego, NY 13126.

Ondorio gisa, esan genezake aurkeztutako material multimedia Lehen Hezkuntza osoan erabiltzeko baliagarria dela. Gainera, material motibagarria da eta horrela, matematikarekin jolasten ikasi dezakete, matematikak aspergarriak diren ideia ahaztuz.

KONPETENTZIA DIGITALA

    Konpetentzia digitalari buruzko bi bideo aurkeztuko dizkizuet, alfabetizazio digitalari buruzkoak hain zuzen. Hala ere, ikuspuntu desberdina dute, beraz, hausnarketarako baliogarriak izatea espero dut.                

  

Aurkeztutako bi bideoak konparatuz....

"Multimedia Literacy Digital Story" izeneko bideoan teknologia berriek, konpetentzia digitalak hain zuzen, hezkuntza arloan ahalbidetu duen aldaketari egiten dio erreferentzia. Horretarako bi egoera aurkezten dizkigu; alde batetik, teknologia berriak existitu aurretik eskolan zeuden ikasleen ametsak plazaratzen ditu: Greziako tenpluak aztertzea gustatuko litzaidake...;ilargira bidaiatzea gustatuko litzaidake...;benetako dinosaurioa ezagutzea ondo legoke... Bestetik, gaur egungo egoera azaltzen du konparaketa bat eginez; gaur egungo umeak amets egiten dute baina, amets horiek gure errealitatearen parte izan daitezke teknologia berriei esker. Izan ere, aipatutako gauzak ikusi daitezke, aztertu daitezke eta esperientzia berriak bizitzeko aukera daukagu.

Bigarren bideoan, berriz, hezkuntza arloan eman diren aldaketei egiten die erreferentzia Tiscar Larak, Madrileko Carlos III Unibertsitateko irakasleak, baina denboran zehar eman diren aldaketei baino, gaur egungo egoerari buruz hitz egiten du honek; alfabetizazio digital kritikoaren beharrari hain zuzen. Irakasle honek idazmen eta irakurmen digitalaren garrantzia azpimarratzen du ikuspuntu kritikoa abiapuntutzat harturik, sarean dagoen informazioa interpretatzen ikasi behar dugulako. Konpetentzia digitala ez da bakarrik tresnak erabiltzea, askoz ere kontzeptu zabalagoa da. Informazioaren kontsumitzaile gisa, argi izan behar dugu zer bilatu nahi dugun, zer behar dugun, nola eta non bilatu jakin behar dugu, nork sortu duen jakin behar dugu eta aztertu beharko dugu, informazio hori interpretatu ahal izateko. Informazioaren ekoizle gisa, berriz, komunikatzen eta gure ikuspuntuak azaltzeko gai izan beharko ginateke eta hori eskolaren eginkizuna da. Gainera, teknologia berrien "atzean" dagoenari buruzko hausnarketa egitera bultzatzen gaitu, kultura digitala bere osotasunean ulertzeko eta honetan parte hartzeko asmoz. Beraz, eskolak kultura digital honen partaide izateko, bertako ezagutzak konpartitzen hasi beharko dira inongo berdurrik gabe.

Laburbilduz...bi bideo hauetan, konpetentzia digitalaren garratzia azpimarratzen da, teknologia berriek eskaintzen dizkiguten aukerak ahalik eta hoberen aprobetxatzeko asmoz. Hala ere, lehenengoak lehen eta oraingo ikasleen ametsak alderatzen ditu, lehen eta gaur egungo aukerak alderatuz eta konpetentzia digitalaren kontzeptu mugatua plazaratuz; informazioa jasotzeko, teknologia berrien kontsumitzailea gara. Bigarrenak, berriz, alfabetizazio digitalaren kritikotasunari ematen dio garrantzia kultura digitala ulertu eta bertan parte hartu ahal izateko. Hau da, konpetentzia digitala askoz ere modu zabalagoan azaltzen du, teknologia berrien erabiltzaileak ekoizle gisa ulertuz, ezagutza soziala eratu ahal izateko.

...ESKOLA 2.0 ETA ARBELA DIGITALAK...

 

"Programas Escuela 2.0 y Pizarra Digital: un paradigma de mercantilizacion del sistema educativo a traves de las TICs"

José Luis MURILLO GARCIA

ESKOLA 2.0 ETA ARBELA DIGITALAK

 

 

2009-2010 ikasturtearen hasieran, Hezkuntza sailaren eta multinazional eta editorial batzuen artean zenbait batzar egin ondoren, "eskola 2.0" programa onartu zen. Programa honen helburu bakarra teknologia berriak erabiltzeko azpiegiturak egitea eta teknologia eskoletara eramatea da, multinazionalei eta editorialei produktu berriak egiteko aukera eskainiz, hauen etekin ekonomikoak bermatuz eta inolako planteamendu pedagogikorik kontua hartu barik. Hezkuntza proiektu bat izan arren, ez dituzte irakasle, ikasle edota gurasoen iritziak kontuan izan, beraz, eskola 2.0 programaren bidez ezinezkoa da gure hezkuntza sistemak dituen arazoak konpontzea, ez baitu inolako hezkuntza eredurik aurkezten bizi garen "gizarte digitalerako". Gainera, ez die aurre egiten gure ikasleek dituzten irakurmen eta matematika arazoei, ezta porrot eskolarrari eta gure irakasleen formakuntza eskasari ere. Izan ere, egitasmo honek pedagogian baino, teknologia berrietan eta etekin ekonomikoetan jartzen du indarra, irakasleen parte hartzea, formakuntza maila, eskolen beharrizanak edota proposamen didaktikoak bazertuz.

"Eskola 2.0" egitasmoa ez da orain dela urtebete sortu, 2003. urtean Aragoin martxan jarritako "Pizarra digital" programa da horren aitzindari. Bertan, tabletPC eta proiektoreak ipini ziren geletan, teknologia berriak erabiltzen zituzten irakasleen esperientzia eta iritziak kontuan izan gabe. Irakasle askoren iritziz gobernuak diru publikoa bota zuen interes ekonomiko pribatuen alde. Gainera, programa hau sustatzeko tegnologia berriei buruzko mito asko erabili ziren eta egin diren ikerketek argi adierazten dute emaitza akademikoak berdinak direla. Hau da, egitasmo berri horrek ez zuela eraginik izan hezkuntza arloan.

Aragoiko proiektu hau ezagututa eta "eskola 2.0" horren antzekoa dela ikusita, eskola eta irakasle askok ez daude ados proiektua aurrera eramatearekin ez baitaukate aukera teknologia berriak beren errealiatera egokitzeko. Hala ere, honek ez du esan nahi teknologia berriak eskolan erabiltzearen aurka daudenik. Izan ere, hauek erabiltzearen alde daude eta irakaskuntza-ikaskuntza prozesurako tresna aberatsak direla diote baina guzti horren atzetik estrategia pedagogikoak eta metodologia aldaketak egon behar dira.

Beraz, bizi garen gizarte digital honetan argi dago hezkuntza sistemak erreminta digitalak erabili behar dituela baina horretarako "eskola 2.0" bezalako proiektuen helburua ezin da ekonomikoa izan. Hauek aukerak eman behar lituzkete ezagutzarekiko baloreak aldatzeko, ikaskuntza prozesurako, metodologiarako eta baliabide eta materialak konpartitzeko, hezkuntza arloan lan egiten dutenen iritziak eta esperientziak kontua izanda.

Bizi garen informazioaren gizartetik ezagutzaren gizartera pasatzeko eskola 2.0 proiektua aukera ezin hobea izango litzateke. Argi dago arbela digitalak edota ordenagailuak gela batean egoteak ez duela ezertarako balio eta ez duela ikasleen gaitasunik inplikatzen. Konpetentzia digitala garatzeko alfabetizazio digitala  beharrezkoa, hau da, informazio digitala kontsumitu eta ekoiztu ahal izateko trebetasuna, eta horretarako, arestian aipatu dugun moduan   ikaskuntza-irakaskuntza prozesua aldatu edo hobeto esanda berriztu beharko da.

BloGeN ApLikaZiO DidAkTikOak

Teknologia Berriko klasean irakasleak blogak dituzten aplikazio didaktikoak zeintzuk ziren galdetu zuenean, ikasle gehienok ez genuen jakin zer esan baina apurka apurka hauek hezkuntzan izan ditzaketen abantalil batzuk atera ziren. Horien artean, ikasleen lan autonomoa ahalbidetzen dutela, ezagutzak, ideiak, esperientziak...elkartrukatzeko balio dutela, informazioa biltzeko tresna dela... Zenbait blog didaktiko ikusi ondoren, errazago ikusi ditut blogaren aplikazio didaktikoak.

Hasteko, aipatu behar dugu blog mota desberdinak daudela: eskolakoa, klasekoa, irakasleena, ikasleena...eta bakoitzak funtzio/helburu desberdinak dituela. Hala ere, hauek dira blogak (edozein dela mota) eskolan erabiltzearen arrazoi edota abantail batzuk: sortzeko eta erabiltzeko errazak dira; informazioa kudeatzeko tresna egokiak dira eta diskurtsoa antolatzea exijitzen dute; interaktiboak direnez, ezagutzaren eraketa indibidualaz gain, eraketa soziala ahalbidetzen dute; informazio iturri dira eta gainera, beste informazio iturri batzuekin (web orrialdeekin) loturak eskaintzeko aukera dago; ikasleeak informazio horren kontsumitzaile eta ekoizle bihurtuko dira, parte-hartzea bultzatuz.

Beraz, blogak eskaintzen dizkigun abantaila hauetaz baliatzeko, Interneteko informazioa aukeratzen eta kudeatzen ikasi beharko dugu, gelako metodologia eta ebaluazioa aldatuz.

ETEN DIGITALA

Eten digitala eta hezkuntzari buruzko artikulu bat irakurri nahi baduzue, artikuluaren izenburuan klik egin....
           Reflexiones sobre la brecha digital y educacion

REFLEXIONES SOBRE LA BRECHA DIGITAL Y LA EDUCACION

Julio Cabero Almenara, Universidad de Sevilla

Eten digitala zer den azaltzen hasi aurretik, autoreak argi usten du eten digitala ez dela fenomeno berria, adin, genero, egoera ekonomikoa edo ikuspuntu kulturalaren arabera teknologiaren erabileratik baztertuta egon diren komunitateak egon baitira. Gainera, teknologia berriak formakuntzan erabiltzearen inguruan dagoen mito nagusiena ("Modelo democrático de educación, que facilita el acceso a la misma a todas las personas. Formación/educación para todos") zalantzan ipintzen du, mundu guztiak ez daukalako Internet erabiltzeko aukera eta horrek komunitate batzuk baztertzen dituelako, mitoaren kontrako efektua sorraraziz. Une hau da eten digitalaren fenomenoa agertzen den unea.

Baina, zeri deitzen diogu eten digitala? Modu sinple batean azalduta, sarean sartzeko aukera duten pertsonen, erakundeen, gizarteen edo herrialdeen eta ezin dutenen artean sortzen den ezberdintasunari deritzo. Hau da, teknologia berriei esker informaziora, ezagutzara eta hezkuntzara sartzeko posibilitateen arabera sortzen den desberdintasuna da. Ondorioz, komunitate batzuk garapen ekonomiko,sozial eta giza garapenetik baztertuta daude, horretarako aukera ez baitute. Hala ere, desberdintasun hau aldakorra da komunitate batetik bestera eta eten digitala izateaz gain, eten soziala ere bada, teknologia gizarte inklusio elementua izan beharrean exklusio elementua bihurtu delako. Beraz, ezin dugu eten digitalaz hitz egin, eten mota desberdinak daudelako: ekonomikoa, politikoa, hezkuntza etena, belaunaldikoa, genero etena, hizkuntzakoa, irakasle-ikasle etena eta eten psikologikoa.

Gaur egun, munduko aberastasuna, herrialdeen arteko harreman internazionalak eta teknologiaren erabilera inoiz baino handiagoak dira baina aldi berean, herrialde aberatsen eta pobreen arteko banaketa gero eta handiagoa da. Hau da, mundu mailan interneten hazkundea ematen den bitartean, herrialdeen arteko banaketa areagotzen ari da eta argi dago banaketa hau maila ekonomikoaren araberakoa dela egin diren ikerketetan oinarrituz. Fenomeno hau eten ekonomiko da eta honek, klase sozial berria agertzea eragin du, "baztertuena" hain zuzen. Gainera, autoreak aipatzen duen moduan, teknologia berriak ez dira denon eskura egongo, ekonomia global batean, hauek elementu  estrategiakoak direlako lehiakortasunean oinarritzen den mundu honetan.

Tekonogia berriak politikan ere eragina dute, eten politikoa sortuz. Izan ere, arazoak konpontzeko hauek eskaintzen dizkiguten aukerak anitzak dira. Beraz, hauek eskuragarri ez izatekotan, ez dago arazoak konpontzerik eta berriz ere, komunitate batzuen bazterketa gertatzen da.

Hezkuntza etenak ere eragina dauka eten digitalean. Hau da, teknologia berriak erabiltzeko formakuntza jaso ez duenek (alfabetizazio digitala jaso ez dutenek), sarean sartzeko aukera izan arren, ez diote etekinik aterako teknologia berrien erabilerari. Horregatik esaten da etorkizuneko herritarrek alfabetizazio digitala jaso behar dutela, Interneteko informazioa kudeatzeko,sistema eta kode desberdinak erabiltzeko, teknologia desberdinekin lan egiteko eta informazioa ekoizteko konpetentziak garatuz. Gainera, irakaskuntza- ikaskuntza prozesuetan gero eta garrantzia handiagoa dute teknologia berriek.

Hizkuntza etenak, sarean nagusitasuna duen hizkuntzari (kasu honetan ingelesari) egiten dio erreferentzia. Izan ere, web orrialde berrienak, eguneratuenak, edota zientzia orrialde interesgarrienak hizkuntza horretan daude. Hala ere, honen eragin garrantzitsuena ez da hizkuntza bat edo beste erabiltzea, baizik eta, honek transmititzen duen ikuspegia edota modelo kulturala.

Belaunaldi etenak eta irakasle-ikasle etenak harreman estua daukate. Egin diren ikerketak argi adierazten dute gazteak direla teknologia berriak gehien erabiltzen dituztenak, helduek gizarte postindustrialeko teknologiak erabiltzen dituzten bitartean.  Egoera honek eragina dauka teknologia berriak eskolan erabiltzen direnean. Izan ere, ikasle askoz irakasleak baino hobeto menperatzen dituzte teknologia berriak eta egoera horren aurrean irakasleriaren motibazio falta nabaria da, irakasle-ikasle harremanak aldatuz. Gainera, honek teknologia berriek eskaintzen dizkiguten aukerak alferrik galtzea eragiten du.

Generoaren ondorioz sortutako etena ere badago. Gure gizartean dagoen genero desberdintasuna teknologia berrien erabileran ere ikus dezakegu, gizonezkoek askoz gehiago erabiltzen baitituzte emakumezkoak baino. Hala ere, kulturaren araberakoa izango da, mendebaldeko gizartean badirudielako banaketa hori gero eta txikiago dela.

Azkenik, eten psikologiko edo fisikoa daukagu. Teknologia berriak erabiltzeko aukerak eten digitala areagotzen dute. Nahiz eta eskola gehienetan teknologia berrien erabilera sustatu, badago hauek erabiltzeko zailtasun handiak dituztenak, beharrizan bereziak dituztenak hain zuzen. Beraz, pertsona hauek ere "baztertuta" gelditzen dira.

Egoera honen aurrean, zer egin dezake eskolak? Argi dago ez dela erraz konpontzen den arazoa, faktore desberdinak nahasten direlako, besteak beste, ekonomikoak, giza eskubideak, politikoak, sozialak, pentsaera desberdinak eta ideologikoak. Gainera, ez da nahikoa azpiegiturak egin, hobetu eta hedatzearekin. Horregatik hezkuntza arlotik, irakasleriaren formakuntza hobetu, ikerketa sustatu, industriaren eta hezkuntzaren hurbilketa bultzatu eta parte-hartzea sustatu beharko litzateke. Hala ere, hori bultzatzea bezain garrantzitsua da alfabetizazio digitala ematea (ikasle zein irakasleetan) teknologia berrien aukerak ondo aprobetxatzeko, hezkuntza premia bereziak dituzten ikasleak ahaztu barik.

Artikulu hau irakurri aurretik eten digitalari buruz zer edo zer entzunda nuen baina ez nuke inola ere ez horrelako errealitate hau imajinatuko. Hain modan dauden teknologia berriak beren alde negatiboak dituztela argi neukan baina ez hain larriak zirelarik. Egoera horrelakoa dela jakinda, teknologia berrien inguruan hitz egiten dugunean eten digitala eta honen inguruan dauden gainerako etenak komentatu behako genituzkeela uste dut, gauzak aldatzeko ez bada ere, errealitatea ezagutzeko. Beraz, "komunitate baztertu" gehiago sor ez daitezen, eskola eremutik arazo hau konpontzen saiatu beharko gara ahal dugun neurrian.

Iritzi pertsonalari dagokionez, argi daukat garrantzia gehiegi ematen zaiela teknologia berriei gaur egungo gizartean eta beraz, oraindik ez direla ikusi benetako ondorioak. Hauetako asko, positiboak izango dira, baina beste asko negatiboak izango direla uste dut. Hortaz, bakoitzak gai honi buruz hausnarketa egin behako lukeela uste dut eta horren arabera jardun.

MARKESINA

Kaixo, markesina ipintzeko saiakera bat besterik ez da...

Teknologia Berrien eragina gizartean

Teknologia Berriak etengabeko garapenean daude eta hain azkar ematen diren aldaketak gizartean dute eragina. Etengabeko aldaketa hauek komunikazio prozesuetan eta informazioa tratatzeko moduetan eragin zuzena izan dute eta honek eragina dauka gure bizitzako arlo guztietan, nahiz eta eragin hori desberdina izan pertsona batetik beste batera, baita arlo batetik bestera ere.

TTBBek lana automatizatu dute, informazio asko, gehiegi ez esatearren, eskuragarri jarri digute, informazioa ekoizteko, gordetzeko eta kontsumitzeko aukera berriak eskaini dizkigute, "mundu birtual" batean sartzeko aukera eman digute...Aldaketa guzti hauek teknologia berriak gero eta gehiago erabiltzea eragiten dute eta modu horretan, ohiturak aldatzen diren moduan, aldaketa sozialak ematen ari dira.

Lan egiteko moduak aldatzen ari dira; Industrial gizartean fabriketan lan egiten zen eta gaur egun lan askok etxean lan egitea ahalbidetzen dute, interneten bidez, alegia. Gainera, web 2.0k eskaintzen dizkigun aukerei esker, errazagoa da informazioa konpartitzea eta horrek talde lanak egitea errazten du. Harremantzeko moduak ere aldatzen ari dira eta horrek ere aisialdian dauka eragina. Aisialdiak eta teknologia berriak gero eta erlazio estuagoa dute. Izan ere, ume txikietatik hasita eta gazteekin jarraituz, oso arrunta da ordenagailu (edota play station, psp, telebista...) baten aurrean denbora luzez egotea.

Aldaketa hauek gizartean eragina duten moduan, eskolan ere dute eragina, beraz, eskola ere Teknologia Berrien "garaira" egokitu beharko da. Hala ere, ez dut uste Teknologia berrien benetako ondorioak, epe luzerakoak hain zuzen, ikusi ditugunik. Auskalo zer ikusiko dugun!!!

PROMETEUS - La revolucion de los medios-

Hau da bideoaren lotura ;  " Prometeus".  Beraz, betan klikatu bideoa ikusi ahal izateko. Hala ere, bideoa hemen daukazue.

      * Iruzkina *

Bideo honek komunikabideen iraultzak duen ondorioaren berri ematen digu; Prometeus, bideoan jainkoarekin alderatzen dena, gure etorkizuna da eta horren menpe egongo gara. Hau da, sareak izango duen garrantzia eta boterea hain handia da ze gure bizitza "birtuala" izango baita. Gaur egungo komunikabideak (telebistak, irratiak, aldizkariak, egunkariak...) desagertuko dira eta gure esku dagoen informazio eta ezagutza guztia, gaur egungo komunikabideak barne, on-line egongo da, Prometeusen esku. Edonor izango da informazio eta ezagutzaren ekoizle eta kontsumitzaile eta figura berri horrek "prosumer" izena izango du. Beraz, denok izango  dugu aukera prosumer-rak izateko.

Bideoa ikusita beldurra ematen dit etorkizuneko gizarteak eta ezin dut sinestu edo ez dut sinestu nahi etorkizun hori. Sarearen menpe dagoen "mundu birtual" batean biziko gara eta errealitatean ezinezkoak diren gauzak gertatuko dira; pertsonak izan nahi dutenean bihurtu daitezke, memoria konpartitu ahal izango da, existitzen ez diren lekuetan egon edota existitzen ez diren pertsonekin harremanetan egon gaitezke...Hau guztia Prometeus-ek ahalbidetzen digu, beraz, Prometeus-ek eskaintzen diguna egin ahal izango dugu, sareak eskaintzen diguna.

Hau guztia horrela bada, zer da pertsona bakoitza desberdina egiten gaituena? Ez dugu askatasunik izango nahi duguna egiteko, idazteko, irakurtzeko...eta gure bizitza guztiz kontrolatuta egongo da. Gu geu izan arren sarea neurri batean "eraikitzen" dugunok, muga batzuk egongo dira, kontrol bat egongo da.

Egia da internet oso tresna erabilgarria eta lagungarria dela hezkuntza munduan eta argi dago komunikabideen iraultzak eragina izango duela eskolan, beraz, aldaketak eman behar dira. Eskolak egin beharko lukeena da internet den tresna hori  erabiltzen irakatsi. Horretarako, ume bakoitzak ordenagailuak nola erabiltzen diren irakatsi baino, balore batzuk transmititu beharko lituzke interneten erabilera on bat egiteko. Hortaz, eskolaren erronka nagusia ez da ordenagailuen edota sarearen  funtzionamendua ezagutzen duten ikasleak sortzea, baizik eta, interneten erabilera on bat egiteko behar diren baloreak transmititzea. Izan ere, gaur egungo gizartean umeek txikitatik ordenagailu eta sarearekin harremanetan daudelako eta nola "funtzionatzen" duten dakitelako.

Beraz, ez litzaidake gustatuko bideoan ikusi dudana etorkizuneko errealitatea izatea, abantaila baino desabantaila izugarria iruditzen zaidalako "mundu birtual" batean bizitzea. Dena on-line egongo da, baina...non dago on-line dagoen informazioa?; nork gordetzen du informazio hori? ; egunen batean sarean arazoak badaude, nola eskuratuko dugu on-line dagoen informazio eta ezagutza guztia?

Etorkizunean gizakia sarearen menpe biziko da eta penagarria iruditzen zait askatasuna aldarrikatzen duen gizarte batek horrelako etorkizun baten aurrean hain trankil egotea.

LOTURAK (link-ak) SARTZEKO APROBA

Post honetan loturak nola sartzen diren ikusiko dugu. Adibidez, hemen klik egiten EHUko orrira joango gara.

      - nueva entrada
      - testu bat edatzi edota "hitz berezia" (hemen klik edo nahi dugun hitza) idatzi.
      - Enlace-ri eman eta nahi duzun lotura idatzi

Beste saiakera bat egingo dut ondo ulertu dudan frogatzeko;
        Moodle-en sartzeko moodle hitza klikatu behar duzu....

ZER DA WEB 2.0 ?

    Web 2.0 kontzeptua fenomeno sozial batekin erlazionatzen da, aplikazio desberdinen elkarrekintzan oinarritzen dena. Internet ulertzeko eta erabiltzeko ikuspuntu berria da eta interneteko espazioetan parte hartzeko aukera ematen digu. Honen bitartez, informazioa trukatzea, erabiltzaileak ekarpenak egitea, kolaborazioa, elkarrekintza..., azken finean, parte-hartzea bultzatzen da. Izan ere, erabiltzaileak "kontsumitzaileak" izatetik "ekoizleak" izatera pasatu dira.

    Hasieran aipatu dugun moduan, Web 2.0 aplikazio desberdinek osatzen dute eta aplikazio hauek dira parte-hartzeko eta informazioa elkartrukatzeko tresna. Aplikazio hauen artean, Blog-ak, Wiki-ak, edota RSS-a aurki ditzakegu.

       - Blog-ak oso erraz sor daitezkeen web orrialdeak dira. Bertan publikatutako artikulu edo bideoen bidez egituratuta daude, azkenengo publikazioa lehenengo "postuan" agertzen delarik. Hauek, gainera, irakurleek beren iritzia bertan idazteko aukera ematen dute.

- Wiki-ak erabiltzaileei irekita dauden orrialdeak dira hauen artean kooperazioa eta elkarlana ahalbidetzeko asmoz. Horrela, erabiltzaileek web horretako edukia aldatu, osotu, zuzendu edota gehitu ahal izango dute.

- RSS aplikazioa suskribatzeko "alerta" sistema bat da. Honen bidez, nahi dugun web orrialdeetan agertzen den gai bati beruzko informazioaren berri izango dugu.

    Internet ulertzeko filosofia honi esker, web orrialdeak lehen baino askoz ere dinamikoagoak dira, erabiltzaileak informazio sortzaileak eta web berriaren "bihotza"  bihurtu garelarik. Baina...ez al du filosofia honek ondoriorik gure gizartean?

Komunikabideen eta publizitatearen munduan aldaketak eman diren bezala, pertsonen arteko erlazioetan ere ematen ari dira aldaketak, beraz, sarean dauden edukien ekoizleak geu garen heinean, zenbait kontzepturen inguruan hausnatu behako genukeela uste dut; Zein da nire identitatea mundu birtual honetan?; Zein da nire helburua TTBB erabiltzeko orduan?; Zeri ematen diot garranztia?; Zelako informazioa publikatuko dut sarean? Zertarako? Nori zuzenduta?... Galdera guzti hauek ez dute erantzun bakarrik baina interesgarria iruditzen zait hauen inguruan hausnarketa egitea.

Gainera, gizartean ematen diren aldaketak eskolan eragina dute, beraz, TTBB eskaintzen dizkiguten aukerak aprobetzatu beharko dira, beti ere, gu geu garelarik sarea maneiatzen dugunok, sarearen menpekotasunean erori ez gaitezen.

HEZKUNTZA ETA WEB 2.0

Hezkuntza eta teknologia berrien arteko erlazioa ikusteko aukera ona iruditu zait bi bideo labur hauek aurkeztea. Sinpleak dira, baina pixkanaka pixkana  "mundu birtual honetan"sartu beharko gara.

...AURKEZPENA....

    Lehen Hezkuntzako 3. mailako ikaslea naiz EHUko magisteritza eskolan. Aurten, "Hezkuntzari aplikaturiko teknologia berriak" izeneko ikasgaia daukagu eta hitzak beran dioen moduan, teknologia berriekin erlazionatuta dago, beraz, egin dugun lehenengo jardueretako bat blog bat irekitzea izan da.

Nire blogaren izena "Teknologia berriak eskolan" du izena eta teknologia berriek irakaskuntzan  eta informazioaren gizartean duten erabilera, eragina, ondorioak...komentatzea eta ikustea du helburu.

Hala ere, lehengo eta behin neure buruari egin dizkiodan galderei erantzuna bilatzen saiatu behar naiz;

         Zer dira teknologia berriak?

                          Nola funtzionatzen dute?

                                       Zeintzuk dira hauen ondorioak?

 Erronka berri honetarako, nola ez, zuen laguntza behar izango dut...beraz, ongi etorri blog berri honetara!